ᐱᓕᕆᐊᓂᑦ ᐱᓕᕆᔨ

ᐱᓕᕆᐊᓂᑦ ᐱᓕᕆᔨ 

ᐱᕕᔅᓴᐅᔪᖅ ᓇᓗᓇᐃᔭᕐᓯᒪᓂᖓ 

ᓄᓇᓕᐸᐅᔭᐃᑦ ᐃᖃᓗᐃᑦ ᕿᓂᖅᑐᑦ ᐊᔪᙱᑎᐊᖅᑐᒥᑦ ᐊᒻᒪ ᑲᔪᖏᖅᓴᐃᔪᓐᓇᖅᑐᒥᒃ ᐱᓕᕆᐊᓂᑦ ᐱᓕᕆᔨᒥᒃ ᐃᑲᔪᖃᑦᑕᓂᐊᖅᑐᒥᑦ ᐸᓐᓇᐅᑕᐅᔪᓂᒃ, ᐋᖅᑭᔅᓱᐃᓂᕐᒥᒃ, ᐊᒻᒪ ᓴᖅᑭᑎᑦᑎᓂᕐᒥᑦ ᐱᒻᒪᕆᐅᔪᓂᑦ ᓄᓇᓕᓐᓂ ᒪᑭᒪᔾᔪᑎᓄᑦ ᐱᓕᕆᐊᓂᑦ. ᐅᖃᕐᕕᖃᖅᐸᑦᑐᖅ ᐊᖏᔪᖅᑳᖓᓄᑦ ᐊᐅᓚᐅᓯᕆᓂᕐᒧᑦ ᐊᒻᒪ ᐊᑭᑐᔫᑎᓄᑦ ᐱᓕᕆᐊᓂᒃ, ᐅᓇ ᐃᖅᑲᓇᐃᔮᖅ ᑲᒪᒋᔭᖃᖃᑦᑕᕐᑐᖅ ᐊᑭᑐᔫᑎᓂᒃ ᐊᒻᒪ ᐊᐅᓚᑦᑎᓪᓗᓂ ᐱᓕᕆᐊᓂᒃ, ᒪᓕᒐᕐᓂᒃ ᒪᓕᑦᑕᐅᔭᕆᐊᓕᓐᓂ ᐱᓕᕆᐊᖑᔪᓂᒃ, ᒪᑭᒪᔾᔪᑎᓄᑦ ᐱᓇᓲᑎᑖᕐᑎᑦᑎᓂᕐᒥᒃ, ᐊᒻᒪ ᑳᓐᑐᕌᓕᕆᓂᕐᒥᒃ ᐊᐅᓚᑦᑎᓗᓂ. ᓂᕈᐊᖅᑕᐅᔪᖅ ᐱᒻᒪᕆᐊᓗᒻᒥ ᐊᑐᓕᖅᑎᑦᑎᖃᑦᑕᓂᐊᖅᑐᖅ ᐊᒻᒪ ᐱᐅᓯᕚᓪᓕᑎᑦᑎᓗᓂ ᐱᔭᐅᔭᕆᐊᖃᖅᑐᓂᒃ ᓄᓇᓕᓐᓂ ᒪᑭᒪᔾᔪᑎᓂᒃ ᐱᓕᕆᖃᑎᖃᕐᓗᓂ ᐅᖃᐅᔾᔨᒋᐊᕐᑎᓂᒃ, ᑳᓐᑐᕌᖅᑎᐅᔪᓂᒃ, ᒪᓕᒐᕐᓂᒃ ᐱᓕᕆᕕᐅᔪᓂᒃ, ᐊᒻᒪ Hᐊᒻᒪᓚᒃᑯᑦ ᐃᖅᑲᓇᐃᔭᖅᑎᖏᓐᓂ. 

ᐊᑭᓕᖅᑕᐅᔾᔪᑎᓄᑦ ᖃᓄᐃᓕᖓᓂ 

• ᐃᑲᕐᕋᒧᑦ ᐊᑭᓕᕐᓲᑎ: $51.71 ᐊᑕᐅᓯᖅ ᐃᑲᕋᖅ 

• ᐃᑲᕐᕋᐃᑦ ᐃᖅᑲᓇᐃᔭᕐᓇᐃᑦ: 35 ᐃᑲᕐᕋᓕᐅᑉᐸᓪᓗᓂ ᐱᓇᓱᐊᕈᓯᒻᒥ 

• ᐊᖏᖅᑕᐅᔪᑦ ᑮᓇᐅᔭᑦ ᐃᑲᔫᓯᐊᑦ: $20,907.44/ᐊᕐᕌᒍᑕᒫᑦ 

• ᖃᓄᐃᓐᓂᖓ: ᐅᓪᓗᓕᒫᖅ, ᐃᖅᑲᓇᐃᔮᖑᐃᓐᓇᖅᑐᖅ 

• ᑲᑐᔾᔨᖃᑎᒋᑦ ᖃᓄᐃᓕᖓᓂᖏᑦ: ᑲᑐᔾᔨᖃᑎᒌᑦ 

ᑲᒪᒋᔭᒃᓴᓪᓗᐊᖅᑕᐃᑦ 

• ᐋᖅᑭᔅᓱᐃᕙᓪᓗᓂ ᐊᒻᒪ ᑲᒪᒋᖃᑦᑕᕐᓗᒋᑦ Hᐊᒻᒪᓚᒃᑯᑦ ᐊᑭᑐᔫᑎᖏᑦ ᐊᒻᒪ ᐊᐅᓚᑦᑎᓗᓂ ᐱᓕᕆᐊᓂᒃ ᐱᔭᕇᖅᑕᐅᑦᑎᐊᖁᓪᓗᒋᑦ ᐃᖅᑲᓇᐃᔮᑦ ᐊᑦᑕᓇᖏᑐᒃᑯᑦ, ᓈᒻᒪᖅᑯᑎᓗᑎᑦ, ᑮᓇᐅᔭᖅᑐᕈᑎᔅᓴᐃᑦ ᓈᒻᒪᓪᓗᑎᑦ, ᐊᒻᒪ ᒪᓕᓪᓗᒋᑦ ᐊᖏᖅᑕᐅᓯᒪᔪ ᓇᓗᓇᐃᔭᖅᓯᒪᔪᑦ. 

• ᐊᐅᓚᑦᑎᓗᓂ ᓂᐅᕕᕈᑕᐅᓇᓱᑦᑐᓂᒃ ᐊᒻᒪ ᐊᑭᑦᑐᕋᐅᑎᔾᔪᑎᓂᒃ ᐱᓕᕆᐊᖃᕐᓗᓂ, ᕿᒥᕐᕈᖃᑦᑕᕐᓗᒋᑦ ᐊᑭᑦᑐᕋᐅᑏᑦ, ᐃᑲᔪᖅᑐᐃᓗᓂ ᑳᓐᑐᕌᓄᑦ ᐋᔩᖃᑎᒌᒍᑕᐅᔪᓂᒃ, ᐊᒻᒪᓗ ᐊᐅᓚᑦᑎᓗᓂ ᐱᓕᕆᐊᓄᑦ ᐊᖏᖃᑎᒌᒍᑎᓂᒃ. 

• ᖃᐅᔨᓴᖃᑦᑕᕐᓗᒋᑦ ᐃᓂᒋᔭᐅᔪᑦ, ᖃᐅᔨᓴᖃᑦᑕᕐᓗᒋᑦ ᑳᓐᑐᕌᒃᑎᓄᑦ ᐱᓕᕆᑦᑎᐊᕐᓂᕆᔭᐅᔪᑦ, ᕿᒥᕐᕈᖃᑦᑕᕐᓗᒋᑦ ᐱᕙᓪᓕᐊᓂᐅᔪᑦ ᑐᔅᓯᕋᐅᑎᑦ, ᐊᒻᒪ ᐃᑲᔪᕐᓱᖃᑦᑕᕐᓗᒋᑦ ᐱᓕᕆᐊᑦ ᒪᑐᔭᐅᔪᑦ. 

• ᐊᐅᓚᑦᑎᓗᓂ ᐆᒻᒪᖅᑯᑎᓄᑦ ᐋᖅᑭᑦᑕᐅᔾᔪᑎᓄᑦ ᐱᔪᓐᓇᐅᑎᓂᒃ, ᐊᖅᑯᑎᓂᒃ ᓇᑲᑎᕆᓂᕐᒧᑦ ᐱᔪᓐᓇᐅᑎᓂᒃ, ᐊᒻᒪᓗ ᐱᔪᓐᓇᐅᑎᓂᒃ ᐊᖅᑯᑎᓄᑦ ᐱᓕᕆᐊᖑᔪᓂᒃ ᐊᑦᑐᐃᓂᖃᖅᐸᑦᑐᑦ ᓄᓇᓕᓐᓂ ᒪᑭᒪᔾᔪᑎᓂᒃ. 

• ᐱᓕᕆᐊᓄᑦ ᐅᓂᒃᑳᓕᐅᖅᐸᓪᓗᓂ, ᒪᓕᒐᕐᓂᒃ ᑎᑎᖅᑲᓕᐅᖅᐸᓪᓗᓂ, ᐅᖃᐅᔾᔨᒋᐊᖅᑎᓂᒃ ᕿᒥᕐᕈᖃᑦᑕᕐᓗᓂ, ᐊᒻᒪ ᐃᒥᕐᒧᑦ ᓚᐃᓴᓐᓯᑖᕈᑎᓄᑦ ᐅᓂᒃᑳᓕᐅᖅᐸᓪᓗᓂ. 

• ᐃᑲᔪᕐᓱᕐᓗᒋᑦ ᐊᐅᓚᐅᓯᕆᓂᕐᒧᑦ ᐸᓐᓇᐅᑕᐅᕙᓪᓕᐊᔪᑦ, ᓇᒻᒥᓂᖃᖅᑐᓄᑦ ᐱᕙᓪᓕᑎᑦᑎᓂᐅᔪᑦ, ᐊᒻᒪ ᐊᑭᑐᔫᑎᓂ ᐱᐅᓯᕚᓪᓕᕈᑎᔅᓴᓂᒃ ᐱᒋᐊᖅᑎᑕᐅᓯᒪᔪᓂᒃ. 

ᐱᓕᕆᒍᓐᓇᐅᑏᑦ 

• ᖁᑦᑎᓂᕐᓴᒥᒃ ᓇᓗᓇᐃᒃᑯᑕᖃᕐᓗᓂ ᐅᕝᕙᓘᓐᓃᑦ ᓇᓗᓇᐃᒃᑯᑕᖃᕐᓗᓂ ᐊᐅᓚᐅᓯᕆᓂᕐᒧᑦ, ᐊᐅᓚᐅᓯᕆᓂᒧᑦ ᐱᓕᕆᔾᔪᓯᓂᒃ, ᐅᕝᕙᓘᓐᓃᑦ ᐊᑦᑐᐊᓂᖃᖅᑐᒥᒃ ᐃᓕᓐᓂᐊᕈᑎᒥᒃ. 

• ᖃᑦᑏᓇᐅᓂᖅᐹᖑᓗᑎᑦ ᑕᓪᓕᒪᑦ (5) ᐊᕐᕌᒍᑦ ᐱᓕᕆᖃᑦᑕᕐᓯᒪᓂᖏᑦ ᐊᐅᓚᑦᑎᓕᕐᒥᒃ ᐊᐅᓚᐅᓯᕆᓂᕐᒧᑦ, ᐃᓪᓗᓕᐅᕐᓂᕐᒧᑦ, ᒪᑭᒪᔾᔪᑎᓕᕆᓂᕐᒧᑦ, ᐅᕝᕙᓘᓐᓃᑦ Hᐊᒻᒪᓚᒃᑯᑦ ᐱᓕᕆᐊᖏᓐᓂ. 

• ᖃᐅᔨᒪᓂᖃᕐᓗᓂ ᐊᐅᓚᐅᓯᕆᓂᕐᒧᑦ ᐃᓪᓗᓕᐅᕐᓂᕐᒧᓪᓗ ᐊᑐᖅᑕᐅᕙᑦᑐᓂᒃ, ᐱᓗᐊᙳᐊᕐᓗᓂ ᐅᑭᐅᖅᑕᖅᑐᒥ ᐅᖓᓯᑦᑐᒦᑦᑐᓂᑦ. 

• ᐱᓕᕆᐊᓂᒃ ᐊᐅᓚᑦᑎᔪᓐᓇᑎᐊᕐᓗᓂ, ᑳᓐᑐᕌᓂᒃ ᐊᐅᓚᑦᑎᔪᓐᓇᕐᓗᓂ, ᑮᓇᐅᔭᖅᑐᕈᑎᔅᓴᓕᕆᔪᓐᓇᕐᓗᓂ, ᑳᓐᑐᕌᒃᑎᓂ ᐋᖅᑭᔅᓱᐃᔪᓐᓇᕐᓗᓂ, ᐊᒻᒪ ᒪᓕᒐᕐᓂᒃ ᒪᓕᑦᑕᐅᔭᕆᐊᓕᓐᓂ ᐊᔪᙱᓐᓂᖃᕐᓗᓂ. 

• ᐊᑐᕈᓐᓇᑎᐊᕐᓗᓂ Microsoft Office ᐱᓕᕆᔾᔪᓯᒥᒃ ᐊᒻᒪ ᐱᓕᕆᓂᖃᕐᓯᒪᓗᓂ AutoCAD−ᒥ. ᐱᓕᕆᖃᑦᑕᖅᓯᒪᓂᑰᓗᓂ ᐱᔪᓐᓇᐅᑎᓂᒃ, ᐆᒻᒪᖅᑯᑎᓕᕆᔾᔪᑎᓂᒃ, ᐊᒻᒪ Hᐊᒻᒪᓚᐃᑦ ᐊᐅᓚᓂᕆᔭᖏᓐᓂᒃ ᐊᑑᑎᖃᕈᓐᓇᑎᐊᕐᑐᖅ. 

• ᐱᓕᕆᔾᔪᓯᓂᒃ ᐅᓂᒃᑳᓕᐅᕈᓐᓇᕐᓗᓂ, ᐊᐅᓚᑦᑎᔪᓐᓇᕐᓗᓂ ᐊᒥᓱᓂᒃ ᓯᕗᓪᓕᖅᐸᐅᖁᔭᓂᒃ, ᐱᓕᕆᖃᑎᒌᒍᑎᔅᓴᓂᒃ ᐋᖅᑭᔅᓱᐃᕙᓪᓗᓂ, ᐊᒻᒪᓗ ᑐᓴᐅᒪᖃᑎᖃᑦᑎᐊᖃᑦᑕᕐᓗᓂ ᐊᔾᔨᒌᖏᑦᑐᓂᒃ ᓇᒻᒥᓂᖃᖅᑎᐅᔪᓂᒃ. 

ᐆᑦᑐᕋᓱᐊᕆᑦ ᐅᓪᓗᒥ 

ᐱᓕᕆᖃᑦᑕᕐᓯᒪᓂᑰᒍᕕᑦ ᐊᐅᓚᐅᓯᕆᓂᕐᒥᒃ ᐅᕝᕙᓘᓐᓃᑦ ᒪᑭᒪᔾᔪᑎᓄᑦ ᐱᓕᕆᔨᓪᓚᕆᐅᒍᕕᑦ ᑐᑭᖃᑦᑎᐊᖅᑐᒥᒃ ᐊᑦᑐᐃᔪᒪᒍᕕᑦ ᐱᕈᖅᐸᓪᓕᐊᔪᒥᒃ ᐅᑭᐅᖅᑕᖅᑐᒥ Hᐊᒻᒪᓚᒥᒃ, ᑎᓕᐅᖅᐸᒋᑦ ᐱᓇᓱᖁᓪᓗᑎᑦ. 

ᒪᓕᓪᓗᒍ ᐊᑐᐊᒐᖅ 23 ᓄᓇᕗᑖᕐᓂᕐᒧᑦ ᐊᖏᕈᑎᓄᑦ, ᓯᕗᓪᓕᐅᑎᑕᐅᓂᐊᖅᑐᑦ ᓄᓇᕗᑖᖅᓯᒪᔪᓄᑦ ᐱᔪᓐᓇᐅᑎᖃᖅᑐᓄᑦ.